ඇඟට හිරට කොටට ඇඳල ලෙඩ දාගන්නේ කුමටද? මේ ඇඳුම අපට සැනසිල්ලක්!

හිජාබ්
හිජාබ්

මුස්‌ලිම්වරුන්ගේ ජීවිතවල බොහෝ දේවල් තීරණය වන්නේ ඔවුන්ගේ ආගමට අනුවය. මුස්‌ලිම් කාන්තාවන් ජීවත් විය යුතු ආකාරය, අඳින පළඳින හැටි තීරණය කරන්නේද ඉස්‌ලාම් දහමට අනුකූලවය. එහෙත් මුළු සර්වාංගයම වසාගෙන සිටින මුස්‌ලිම් කාන්තාවන්ගේ ඇඳුම සමාජයේ විවිධ කතාබහට තුඩු දී තිබෙන විලාසිතාවකි. එහෙයින් මුස්‌ලිම් කාන්තාවගේ ඇඳුම් විලාසිතාව ගැන අපි මුස්‌ලිම් කාන්තාවන් කිහිප දෙනකුගෙන් මත විමසුවෙමු. පහතින් පෙළ ගැසෙන්නේ ඔවුන්ගේ අදහස්‌ය.

 

හිජාබය බාධාවක් නොවේ
හිජාබය බාධාවක් නොවේ

ඔබ ඔය ඇඳගෙන ඉන්න ඇඳුමට කියන නම මොකක්‌ද?

මේකට කියන්නේ කබාය කියලා…

ඇඳුමත් හලාල් ද?

නැහැ… නැහැ…. සිනාවකි.

ඔය ඇඳුම ඔබට දුකක්‌ නේද?

 

එහෙම හිතන්න එපා. මේ ඇඳුම අපට සැනසිල්ලක්‌. මේක හරිම පහසුවෙන් ඇඳගන්න පුළුවන්. හොඳට ඉඩ කඩ තියෙනවා. කබාය කියන්නේ කෝට්‌ එකක්‌… මේකට යටින් අපි තව ඇඳුමක්‌ අඳිනවා. ඒ ඇඳුම 100% කොට්‌න් නිසා දහදිය දාන්නෙත් නැහැ. සම අව්වට පිච්චෙන්නේ නැති නිසා හමේ පැහැයේ කිසිම වෙනසක්‌ වෙන්නෙත් නැහැ. මගේ සමහර සිංහල යාළුවෝ කියනවා මුළු ඇඟම වහගෙන ඉන්න නිසා ඔයාගේ හමේ අමුතුම ලස්‌සනක්‌ තියෙන්නෙ කියලා. ඉතිං අපිට ඇඳුම දුකක්‌ වෙන්නේ කොහොමද?

 

තව එකක්‌ තමයි මුළු ඇඟම වහගෙන ඉන්න නිසා අපේ දිහා කවුරුවත් බලන්නෙ නැහැ. ඒ නිසා අපිට හරිම පහසුවෙන් අපේ ගමන් බිමන් යන්න එන්න පුළුවන්. ඇඟ බාගයක්‌ පේන්න ඇඳුම් ඇඳපු අය වගේම ඇඟටම හිර වෙච්ච ඇඳුම් ඇඳගෙන යන ගෑනු දිහා මහ මගදී පිරිමි බලන්නේ හරිම අමුතු විදිහට. ඒ පිරිමින්ගේ හිත්වල මොකක්‌ හරි සිතුවිල්ලක්‌ ඇති වෙන නිසානේ. ඒ සිතුවිලි පාලනය කර ගන්න බැරි වුණහම තමයි පිරිමි වැරැදි විදිහට හැසිරෙන්න හදන්නෙ. අපි මොකටද අපේ ලස්‌සන පෙන්වලා කෙනෙකුගේ හිත් අවුල් කරන්නේ. අපිට පුළුවන්නේ සමාජයේ ඇස්‌වලින් අපේ ඇඟ වහගෙන ඉන්න.

 

කබාය ඇඳීම මුස්‌ලිම් ආගමේ නීතියක්‌ද?

 

නැහැ… අපේ ආගමේ කිසිම දේකට එහෙම නීති දාලා නැහැ. මේ ඇඳුම අඳින්න අකැමැති නම් වෙනත් ඇඳුමක්‌ අඳින්න පුළුවන්. නමුත් මුස්‌ලිම් කාන්තාවන් ඇඳුම් අඳින්න ඕනා මෙන්න මෙහෙමයි කියලා අපේ ආගම නීති හයක්‌ යටතේ පෙන්වා දීලා තියෙනවා. කැමති අයට ඒ නීතිවලට යටත්ව අඳින්න පළඳින්න පුළුවන්. අකැමැති අයට ඒ අය කැමති විදිහට අඳින්න පුළුවන්.

 

ඔය කරුණු හය සම්පූර්ණ කරලා ඇඳුම් අඳිනවා කියන්නේ නීතියකට යටත් වෙලා නෙමෙයිද?

 

හරි… ඒත් අපේ ආගමේ මේ විදිහටම අඳින්න ඕනා කියලා බල කරන්නෙ නැහැ. කැමති අයට අඳින්න පුළුවන්. අකැමැති අයට නෑඳ ඉන්න පුළුවන්.

 

මොනවද ඒ නීති මාලාව…?

 

ඇඟට තදට අඳින්න බැහැ., ගැහැනු පිරිමි වගේ අඳින්න බැහැ, පිරිමි ගැහැනු වගේ අඳින්න බැහැ., මුස්‌ලිම් ජාතිකයෙක්‌ ජාතියේ අනන්‍යතාව තහවුරු වන විදිහට ඇඳුම් අඳින්න ඕනා., මුහුණ සහ අත් දෙකේ මැණික්‌ කටුවට පහළින් හැර මුළු සිරුරම ආවරණය වෙන්න ඕනා., සිරුර විනිවිද පේන විදිහට අඳින්න බැහැ. ඒ කරුණු හය සම්පූර්ණ වන විදිහට අපිට ඕන පාටකින් විලාසිතාවකට ඇඳුම් හදාගන්න පුළුවන්.

 

මුස්‌ලිම් කාන්තාවන්ට අඳින්න පළඳින්න ඉස්‌ලාම් ආගම විසින් එහෙම නීති මාලාවක්‌ දාලා තියෙන්නෙ ඇයි…?

 

මේ ලෝකයේ ලස්‌සනම අය කාන්තාවන්. පිරිමින්ටත් වටිනාම දේ ගැහැනියයි. මේ ගැහැනියකගේ තියෙන ආකර්ෂණීය පෙනුම නිසා තමයි අද සමාජයේ කාන්තාව විවිධ අතවරයන්වලට ලක්‌වන්නේ. කාන්තාවන් අඳින පළඳින විදිහත් මේ අතවරයන්වලට සෘජුව බලපාල තියෙනවා. අද ලෝකයේ කාන්තා අතවරයන් වැඩියෙන්ම සිදුවෙන්නේ යුරෝපා රටවල. මොකද යුරෝපීය කාන්තාවන් ඒ අයගේ සිරුරුවල අවශ්‍යම තැන් ටික විතරයි වහාගෙන ඉන්නේ. අරාබි රටවල තමයි කාන්තා අතවරයන් අඩුවෙන්ම වෙන්නේ. එහෙම වෙලා තියෙන්නෙ ඒ කාන්තාවන් ඔවුන්ගේ සුන්දරත්වය වහගෙන ඉන්න නිසයි. හරි විදිහට විනීතව සංවරව ඇඳුම් පැළඳුම් අඳිනවා නම් සමාජයේ මෙච්චරටම කාන්තා අතවරයන්වලට ලක්‌වෙන්නේ නැහැ.

 

අපි කෙල්ලෝ දෙන්නෙක්‌ව උදාහරණයකට ගමු. එක කෙල්ලෙක්‌ මුස්‌ලිම් විදිහට ඇඳලා, අනිත් කෙනා බටහිර ක්‍රමයට කොට සායක්‌ ඇඳලා ඇඟට තද ටීෂර්ට්‌ එකක්‌ ඇඳගෙන පාරෙ යනවා. කොල්ලෝ වැඩියෙන්ම බලන්නේ කා දිහාද? දෙකක්‌ නැහැ අර කොට සාය ඇඳගෙන යන කෙල්ල දිහානේ. ඉතිං අපි මොකටද එහෙම කැපිලා පේන්න ඇඳගෙන ගිහින් සමාජය තව තවත් දූෂණය කරන්නේ. ඒ වගේම තමයි අද වැඩියෙන්ම පවුල් ප්‍රශ්න ඇති වෙලා තියෙන්නෙත් කාන්තාවන්ගේ විලාසිතා නිසයි. අද කාන්තාවන් විලාසිතා කරන්නේ ගෙදරින් එළියට යනකොට සමාජයට පේන්න. ගෙදර ඉන්නෙ කිළුටු ඇඳුම් ඇඳගෙන. එතකොට නිතරම සමාජයත් සමග ගැටෙන තම ස්‌වාමිපුරුෂයා මහ මඟදී දකින්නේ වෙනත් ගෑනුන්ගේ සුන්දරත්වය. එහෙම වුණහම ඒ අය හිතනවා අර කෙල්ල කොච්චර ලස්‌සනද? අන්න ප්‍රශ්නය ඇති වෙන තැන. ඒකයි අපේ ආගමේ කියන්නෙ කාන්තාව විලාසිතා කරන්න ඕනා තමන්ගේ ස්‌වාමියාට පේන්න විතරයි කියල.

 

මුස්‌ලිම් කාන්තාවන් වෙනත් පිරිමින් ඉදිරියේ මුහුණ විවර කරන්නේම නැද්ද?

 

තමන්ගේ පියා, සහෝදරයන් සහ මාමලා ඉදිරියේදී මොන ඇඳුම ඇඳගෙන හිටියත් ප්‍රශ්නයක්‌ නැහැ.

 

හරි… සමාජයේ වෙනත් පිරිමින් ඉදිරියේ මුහුණ විවර කරන්නේම නැද්ද?

 

මුහුණ විවර කරන අවස්‌ථා තියෙනවා. වෛද්‍ය ප්‍රතිකාර ගන්න වෛද්‍යවරයෙක්‌ ළඟට ගියහම. නීතිමය කටයුතු මත මුහුණ විවර කරන අවස්‌ථාත් තියෙනවා. හැබැයි අපි නම් වෛද්‍යවරයෙක්‌ ළඟට යන්නෙ අපේ සැමියා හෝ පියා සමගයි.

 

වෛද්‍යමය අවශ්‍යතා මත මුස්‌ලිම් කාන්තාවකට ශල්‍යකර්මයක්‌ සිදුකරන්නට වුවහොත් එතකොටත් සැමියා හෝ පියා ශල්‍යකර්මය සිදු කරන තැන ඉන්නවද?

 

නැහැ… නැහැ…. වෛද්‍යට ප්‍රතිකාර මත සම්පූර්ණයෙන්ම ඇඳුම් විවර කරන්න අපේ ආගමෙන් අවසර දීලා තියෙනවා.

 

බටහිර පන්නයට අඳින පළඳින මුස්‌ලිම් කාන්තාවනුත් අපි සමාජයේ දැකලා තියෙනවා.

 

අපි දෙවියන් වහන්සේට ළං වෙන්න වෙන්න සිතට දැනෙන ආශාවල් නැති වෙලා යනවා. ලස්‌සනට ඉන්න ඕන කියලා හිතෙන අය එහෙම අඳිනවා ඇති. එක එක අයගේ සිතුම් පැතුම් විවිධයි නේ. ඕනෑම ජාතියක, ආගමක එහෙම අය ඉන්නවා.

 

කබාය අමතක කරන අයට ඉස්‌ලාම් ආගම මොන වගේ පියවරක්‌ද ගන්නේ…

 

කිසිම දෙයක්‌ කරන්නේ නැහැ… ඒ අයගේ කැමැත්තට අනුව ඕනෑම දෙයක්‌ කරන්න පුළුවන්. හැබැයි ඒ අයව හරි මඟට ගන්න උපදෙස්‌ දෙනවා. අපේ ඇඳුමේ තියෙන වටිනාකම තේරුම් කරලා දෙනවා.

 

ඔබ කිව්වා නීති මාලාවට යටත්ව ඕනෑම විලාසිතාවකට ඇඳුම් හදාගන්න පුළුවන් කියලා. නමුත් මුස්‌ලිම් කාන්තාවන් වැඩියෙන්ම අඳින්නෙ කළු පාට ඇඳුම්නේ..

 

ඇත්ත… කළු කියන්න ඇස්‌වලට ප්‍රිය නැති පාටක්‌. ඉතිං අපි කළු පාට අඳිනකොට සමාජයේ ඇස්‌ කොහෙත්ම අප දෙසට එන්නේ නැහැ. ඒකයි අපි කළු පාට තෝරගන්නේ. නැතුව කළුම අඳින්න ඕනා කියලා ඉස්‌ලාම් ආගමේ කොතනකවත් කියලා නැහැ.

 

මුහුණයි, දැතේ මැණික්‌ කටුවට පහළින් නිරාවණය කරන්න පුළුවන් කියලා ඔබ කිව්වා. ඒත් සමහර මුස්‌ලිම් කාන්තාවන් ඇස්‌ දෙක පේන්න අනිත් සියලුම තැන් වහගෙනයි පාරෙ යන්නේ…?

 

කෙනකුගේ ලස්‌සන වැඩියෙන්ම පේන්නෙ මුහුණෙ. ඊළඟට ඔළුවේ හිස කෙස්‌. එහෙම නම් අපේ අය අනිවාර්යෙන්ම මුහුණ සහ ඔළුව ආවරණය කරන්නම ඕනා. ආගමට භක්‌තිමත් කාන්තාවන් අඳින්න පළඳින්න ඕනා එහෙම තමයි. ක්‍රිස්‌තියානි ආගමේ සිස්‌ටර් කෙනෙක්‌ වුණත් දෙපා වැහෙන්නම ලොකු ඇඳුමක්‌ ඇඳලා කකුල්වලට මේස්‌ දෙකකුත් දානවා. හිස කෙස්‌ ආවරණය කරනවා. අපේ ආගමේ කියන්නේ සියලුම මුස්‌ලිම් ජාතිකයන්ට පුළුවන් දෙවියන්ට ළං වෙන්න. ඒ නිසා අපි ඒ විදිහට අඳිනව පළඳිනවා.

 

මුහුණ ආවරණය කරන විලාසිතාවට මොකක්‌ද කියන්නේ…?

 

ඒකට කියන්නෙ පර්දාව දානවා කියලයි. හිස කෙස්‌ වහන ඒකට කියන්නෙ නිකාබ් කියලයි.

 

ඔබලා පුංචි කාලෙ ඉඳලම කබාය අඳින්න ඕනද?

 

නැහැ… වැඩිවියට පත් වුණහම තමයි එහෙම අඳින්න ඕනා. එතකොටනේ කෙල්ලෙකුව හොඳටම ලස්‌සනට පෙන්නෙ.

 

මුස්‌ලිම් රටවල් අතර මේ ඇඳුම් විලාසිතාව වෙනස්‌ වෙනවද?

 

නැහැ… පොඩි පොඩි වෙනස්‌කම් තියෙනවා. නමුත් ඉස්‌ලාම් ආගමේ නීති හය සෑම මුස්‌ලිම් කාන්තාවකටම පොදුයි.

 

මුස්‌ලිම් කාන්තාවන් විදිහට කළු කබාය ඇඳගෙන සමාජයේ අකටයුතුකම් කරන්න පහසුයි කියලා මතයක්‌ තියෙනවා. පසුගිය දිනක මුස්‌ලිම් කාන්තාවක්‌ විදිහට මුළු සිරුරම වහගෙන බැංකුවක්‌ කොල්ල කන්න පැමිණි පුද්ගලයා ඊට කදිම උදාහරණයයි.

 

අපිට ආරක්‍ෂක හේතූන් මත මුහුණ පෙන්වන්න පුළුවන්නෙ. එතකොට ඒ බැංකුවේ ආරක්‍ෂක නිලධාරීන් ඉන්න ඇතිනේ. ඒ අයට කියන්න තිබුණානේ ඒ පුද්ගලයාට ආරක්‍ෂක හේතූන් මත මුහුණ ඇරලා පෙන්වන්න කියලා. එහෙම කළා නම් පහසුවෙන් ඒ පුද්ගලයාව කොටු කරගන්න තිබුණානේ. එතකොට කවුද වැරැදි? එහෙම ඇඳගෙන යන අපිද? ආරක්‍ෂක නිලධාරීන්ද?

 

සෞදි අරාබිවල හැම කාන්තාවක්‌ම සම්පූර්ණයෙන්ම මුළු සිරුරම වහලා තමයි අඳින්නේ. එතකොට ඒ රටේ මීට වඩා අපරාධ වැඩි වෙන්න ඕනා නේ. එහෙම දෙයක්‌ වෙලා නැහැනේ. අපි මේ විදිහට ඇඳුම් ඇඳගෙන පාරෙ ගියා කියලා සමාජයට හොඳක්‌ මිස නොහොඳක්‌ වෙන්නේ නැහැ.

 

දැන් ඔබ මෙහෙම මුළු සිරුර කළු කබායකින් වහගෙන පාරෙ යන කොට අපහසුතාවලට ලක්‌වුණු අවස්‌ථා නැද්ද?

 

නැහැ.. කවදාකවත් මෙහෙම දෙයක්‌ වෙලා නැහැ. අඩුම තරමින් චෙක්‌ පොයින්ට්‌ එකකදීවත් මට මුහුණ පෙන්වන්න කියලා නැහැ. ගුවන් තොටුපළවලදී එහෙම අපිට විශේෂ සැලකිල්ලකුත් තියෙනවා.

 

මුස්‌ලිම් කාන්තාවන්ගේ ඇඳුමෙන් ඇඟ සම්පූර්ණයෙන්ම වැහිලා නිසා දහදිය පිටවීම අඩු වෙලා දහදිය දුගඳක්‌ හමනවා කියලා සමාජයේ මතයක්‌ තියෙනවා…?

 

එහෙම වෙන්නෙ නැහැ.. කබාය කියන්නෙ හොඳට ඉඩකඩ තියෙන ඇඳුමක්‌. එහෙම නිසා අපේ ඇඟේ රස්‌නය හොඳට පිට වෙනවා. ශරීරය ඇරගෙන ඉන්නකොට තමයි පරිසරයේ තියෙන විෂ දූවිලි හමේ රැදීලා සමේ කුෂ්ට දාන්නේ. දහදිය ගඳ හමන්නෙ. මෙහෙම වහගෙන ඉන්න කාන්තාවන්ගේ මුහුණෙ පිම්පල් දාන්නේ නැහැ. අනිත් එක තමයි මුස්‌ලිම් මිනිස්‌සු දවසට පස්‌ වතාවක්‌ ආගම කියනවා. ඒ ආගම කියන්න කලින් අනිවාර්යෙන්ම කකුල් අත-පය, මුහුණ හොඳින් පිරිසිදු කරනවා. එතකොට අපි කොච්චර පිරිසිදුද?

 

ඔබ කියන එක ඇත්ත වෙන්න ඇති… නමුත් සමාජයේ මතයක්‌ තියෙනවා මුස්‌ලිම් කාන්තාවන්ගේ ඇඳුම නිසා අසාමාන්‍ය දහදිය දුගඳක්‌ හමනවා කියලා…?

 

මිනිස්‌සු අපි දිහා බලන්නෙ වපරැසින්… ඒ අයට ඕන දෙයක්‌ කියන්න පුළුවන්… අපේ ඇඳුම අපිට හොඳයි. මේ විදිහට අඳින එක අපේ හිතටත් සැහැල්ලුවක්‌.

සමාජයේ වෙනත් කාන්තාවන් වගේ ඔබලා රූපලාවන්‍ය කරන්නේ නැද්ද?

රූපලාවන්‍ය කරනවා. කාන්තාවන්ට පමණක්‌ සීමා වුණු අපේ පාටි තියෙනවා. ඒ පාටිවලදී අපිට ඕන විදිහට විලාසිතා කරන්න පුළුවන්. 

 

අද විවිධාකාර විලාසිතා තරග තියෙනවා. මුස්‌ලිම් කාන්තාවන් ඒ තරගවලට ඉදිරිපත් වෙන්නෙ නැද්ද?

 

කොහෙත්ම නැහැ… අනිවාර්යෙන්ම ඒක අපේ ආගමෙන් තහනම් කරලා තියෙන දෙයක්‌.

 

ඉතිං ඔබ බොරුනේ කියන්නෙ… මුස්‌ලිම් කාන්තාවන්ට අඳින්න පළඳින්න වගේම ඔවුන්ගේ බොහෝ කටයුතුවලට ඉස්‌ලාම් ආගමෙන් තහංචි පනවලානේ තියෙන්නේ…?

 

නැහැ… නැහැ… අපේ ආගමේ එහෙම තහංචි දාලා නැහැ. නමුත් මුස්‌ලිම් කාන්තාවක්‌ විලාසිතා තරගවලට ඉදිරිපත් වෙන්නෙ නැහැ…

 

දැන් ඔබ කිව්වා නේ ආගමෙන් තහනම් කරලා තියෙන්නෙ කියලා…?

 

එහෙම නෙමෙයි… අපේ ආගමෙන් කිසිම දේකට නීති දාලා නැහැ. මේවා මේ විදිහට කරන්න හොඳ නැහැ කියලා පෙන්වා දීලා තියෙනවා.

 

අද බොහෝ කාන්තාවන් ව්‍යායාම කරනවා. මුස්‌ලිම් කාන්තාවන් එහෙම ව්‍යායාම කරන්නෙත් කළු කබා ඇඳගෙනද…?

 

කාන්තාවන්ට පමණක්‌ සීමා වුණු ජිම් අද ඕනා තරම් තියෙනවා. එහෙම තැන්වල ඉන්නෙත් කාන්තා පුහුණුකාරියන්මයි. ඉතිං අපි එහෙම තැන්වලට ගිහින් ව්‍යායාම කරනවා. නැත්නම් අපේ ඇඳුම ඇඳගෙන මගතොටේ වුණත් ඇවිදලා ව්‍යායාම කරන්න පුළුවන්. ව්‍යායාම, කරාතේ, ස්‌විමිං කරන්න කිසිම බාධාවක්‌ නැහැ. ඒවාට අඳින්න අපිට වෙනම ඇඳුම් පවා තියෙනවා.

 

ඒ ඇඳුම් මොනවද?

 

දිග කලිසමක්‌ සහ අත්දිග ටීෂර්ට්‌ එකක්‌. ඒ ටීෂර්ට්‌ එකේම ඔළුව වැහෙන්නත් කෑල්ලක්‌ තියෙනවා. ස්‌විමින් කරන්න අඳින්නෙත් සම්පූර්ණයෙන්ම සිරුර ආවරණය වුණු ඇඳුමක්‌. ඒත් ප්‍රසිද්ධියේ ස්‌විමින් කරන්නේ නැහැ. කාන්තාවන්ට පමණක්‌ සීමා වුණු පූල්වල විතරයි අපි ස්‌විමින් කරන්නේ.

 

දැන් දැන් බොහෝ මුස්‌ලිම් කාන්තාවන් කබාය අතහරිමින් බටහිර පන්නයට අඳින්න පළඳින්න පුරුදු වෙලා නේද?

 

නැහැ… නැහැ… එන්න එන්න මුස්‌ලිම් කාන්තාවන් මේ ඇඳුමට හුරු වෙනවා. සමාජය වැරැදි පැත්තට යනකොට මුස්‌ලිම් ජනතාව හරි පැත්තට ගමන් කරමින් ඉන්නවා.

 

 

 

තරංග රත්නවීර

දිවයින

 

 

 

 

 

 

 

13 Comments to “ඇඟට හිරට කොටට ඇඳල ලෙඩ දාගන්නේ කුමටද? මේ ඇඳුම අපට සැනසිල්ලක්!

  1. //ඔබ කියන එක ඇත්ත වෙන්න ඇති… නමුත් සමාජයේ මතයක්‌ තියෙනවා මුස්‌ලිම් කාන්තාවන්ගේ ඇඳුම නිසා අසාමාන්‍ය දහදිය දුගඳක්‌ හමනවා කියලා…?//

    හවසට වැඩ ඉවරවෙලා කට්ටිය යන බස් එකකට නැග්ගොත් හරී…..සුවඳයි! (රැකියාවට යන වනිතාවට අපහාසයක් නොවේ. සත්‍යය පැවසුවා පමණි.)

  2. ඇඳුමට කියන නම අබායා නමින් නිවැරදි විය යුතුයි.

  3. ආයෙමත් හබායා… කට කහන අයට අන්න හොඳ මාරතෘකාවක්.

  4. porawal kiyanne nam buruka andapu ayage nidhahasa nati wenwalu,a porawal gen man ahanne ethokota sinhala gahanu lamayek mahanawunama eyata labena nidha hasa mokkada.kasadha bandinda naha,lamai bihi karanna baha oya wage thamange jeewithe 1000k pathum nati wenawa.man ahanne mahana wunu a sinhala gahunu lamayai burkawa andagatthu muslim gahunu lamayai athara jeewithey nidhahasin ha sathutin gatha karanne kawdha,?aaaa A wagema thamai tharuniyange kondeth muhunata hari lassanai.jayawewa srilanka

  5. ඉතා හොද ලිපියක් සහ පැහදිලි ලෙස ප්‍රශ්නවලට පිළිතුරුද දී ඇත. මුස්ලිම් කාන්ත්වාගේ ඇදුම සැම විටම අන්‍ය ආගමිකයන්ගේ ඇදුමෙන් වෙනස් වන අතර ඒ වෙනසට හේතු පැහදිලි කිරීම ඉතා අගනේය. මාගේ සොයාබැලීම් සහ නිර්ක්ෂන්යන්ට අනුව නම් බොහෝ මුස්ලිම් නොවන පිරිස් තුල මුස්ලිම් කාන්තාවගේ ඇදුම පිළිබද අවබෝදයක් ඇති අතර ඔවුන් එයට ගරු කරති. (අත්ලොසක් වූ ජත්වාදීන් හැරෙන්න) නමුත් මෑ තක සිට ප්‍රතිවොර්ද්යක් එම ජනතාව අතර අඩු වැඩි වශයෙන් දක්නට ලැබේ. මෙය මා දුටුවේ ඔවුන්තුල මුස්ලිම් කාන්ත්වගේ ඇදුම පිළිබද ප්‍රති විරෝදයකට වඩා ඇදුමේ පැහැය පිළිබද විරොදයක් ලෙසයි. බොහෝ දුරට කළු පැහැය පිළිබද පහදීමක් නැති නිසා සහ එම පැහැයේ ඇති අදුරු බව නිසා බොහෝ මුස්ලිම් නොවන මිනිසුන් මුස්ලිම් කාන්ත්වගේ ඇදුමට ප්‍රති විරොදයක් දක්වන්නට අද සමාජයේ උත්සාහ දරමින් සිටි. මෙය එක අතකට මා දකින්නේ සාමන්‍ය සහ සාදාරන තත්වයක් ලෙසයි. මුස්ලිම් සමාජය තුල මුස්ලිම් කාන්තව කළු ඇදුමක් ආදිය යුත්මද යන්න පිළිබද පැහදිලි කතිකාවක් නැත. ස්මප්‍රදයක් ලෙස අද මුස්ලිම් කාන්තවන් කළු හබායව අදින අතර මෙය සරලවම මැදපෙරදිග අබශ්යෙන් පැමිණි දෙයකි. හබායාව සහ කළු ඇදුම පිළිබද ලාංකීය මුස්ලිම් සමජය දැන සිටියද මෙය ඇදුමක් වශයෙන් කරලියට පැමිණියේ බොහෝ දුරට මැද පෙරදිග ගෘහ සේවයට

    ගිය කාන්තාවන්ගෙනි. (බොහෝ මුස්ලිම් සහෝදරවරු අද මා සමග එකග නොවනු ඇත නමුත් මෙය මා පවසන්නේ මාගේ පැහැදිලි නිරීක්ෂණය තුල හිදමිනි) මැද පෙරදිග ගොස් පැමිණි කාන්තවන් ඉතා පහසුවෙන් මෙම හබයාව ඇදගෙන මග තොට ගමන් කිරීම නිසා බොහෝ මුස්ලිම් කාන්තවන් මේ පිලිබදව පසු කාලීනව වඩා උනන්දුවිය. මන්ද යත් සාරියක් ගැටගහගෙන ගමනක් යාමට බොහෝවිට කාන්තාවකට විශාල කාලයක් යන අතර අවසානයේ සාරිය සම්පුර්ණ ලෙස ඇන්දත් මුස්ලිම් කාන්තව තුල ගැටළුවක් සිතේ සැම විටම තිබුණි මෙම ඇදුම තුලින් ඉස්ල්මය කාන්තාවට පවසන ආකරයෙන් ශරීරය වසේන්වද යන්න. මෙම කරුණු කරනා නිසා සහ හබයාව පහසු ඇදුමක් නිසා (බොහෝ මුස්ලිම් නොවන අතර වැරදි මතයක් තියනවා මෙය ඇදීමට ඉතා අපහසු ඇදුමක් බව නමුත් හබ්යව අදින්න විනාඩියක් වත් ගත නොවේ) සහ ඇදුම ඇදීමට ගතවන්නේ ඉතා සියුම් කාලයක් වන නිසා සහ මේ සියලටම වඩා එම ඇදුම ඉස්ලාමය සදහන් කල ආකරයට ගැලපෙන ඇදුමක් වන නිසාත් බහුලව අද මුස්ලිම් කාන්තව මෙම ඇදුමට ඇලුම් කමක් සහ ඇදීමට ප්රියකිරීමක් දක්වති.

    කෙනෙක් තර්කයක් ලෙසට පැවසුවහොත් හබායව මුස්ලිම් කාන්තාවට බලෙන් පිරිමින් විසි පටවන ලද ඇදුමක් ලෙස එම ප්‍රකාශය තුල ඇත්තේ ඉතා අල්ප සත්‍යකි. ඉස්ලාමය පිළිබද උගත් අවබෝදයක් ඇති සියලු කාන්තවන් සව කමෙත්තෙන් අද හබායව ඇදීමට පුරුදු වී ඇත.

    මුස්ලිම් කාන්තාවට නැති රුදාවක් මුස්ලිම් නොවන පිරිස් අතර මෙතරම් ඇත්තේ ඇයිද යන්න මුස්ලිම් සමාජය විමර්ශනාත්මකව බලා ඇද්දැයි මට ගැටළුවක් තිබේ . (ඕනෑම සමජයක අනෙකාගේ සංස්කෘතික ලක්ෂණ ආගමික විශ්වාසයන්ට ගරු නොකරන පරිබව කරන සුළු පිරිසක් සිටි මා කතා කරන්නේ එම සුළු පිරිස නොවේ මැදහත් පිරිස) . එහිදී මාදුටු නිරීක්ෂණය තමයි ලංකාවේ සහ අනිකුත් රටවල (මුස්ලිම් බහුතරය නොවන රටවල) මුස්ලිම් කාන්ත්වගේ ඇදුමට ප්‍රතිරෝදයක් දක්වන්නේනම් ඒ බොහෝ දුරට මුල්වුයේ ඇදුමේ පැහැය (කළු ) පදනම් කරගෙන මිස ඇදුමේ බාහිර සවරුපය පදනම් කරගෙන නොවේ. මුස්ලිම් විදවතුන් මේ පිළිබද පැහැදිලි සංවාදයක් කර ඇද්දැයි මාහට ගැටලුවකි. කළු පැහැ ඇදුම අනිවාර්ය හෝ කළු ඇදුමෙන් සැරසී සැම විටම ගමන් බිමන් යන්න කියා මුස්ලිම් කාන්තවන කුරානයේ කිසි තැනක මා දන්නා තරමින් දේශනා කර නොමැති අතර අනිකුත් මුස්ලිම් ග්‍රන්ථ විවරණ තුලද එවැනි අනිවාර්ය කිරීමක්ද නොමැත . අප විදව්තුන් කල යුත්තේ කළු හබයාව කරා මුස්ලිම් කාන්තාව දක්කාගෙන යාම නොව ඉස්ලාමයේ සදහන් ආකරයෙන් අලංකාරව සහ සන්කරව ඇදුම් අදින තැනට අප කාන්තව තල්ලු කිරීමයි. (මෙයට හොදම උදහරන්‍ය තමයි මැලේසියානු මුස්ලිම් කාන්තාව ඔවුන් සැම විටම සන්කරව ඉස්ලාමය කියා ඇති ආකාරයෙන් ඇදුම් අදින අතර ඔවුන්ගේ ඇදුම කිසුදු ලෝක සමාජ තලයකදී වත් අබියෝගයකට හෝ ප්‍රශ්න කිරීමකට ලක් වුයේ නැත. ) මෙයට ප්‍රදාන හේතුව ලෙස මා දකින්නේ ඔවුන් කිසි විටකත් කළු ඇදුම් නො හැදීමයි.. බොහෝ දෙනා එකග නොවෙන්න පුළුවන නමුත් මා මෙහි ලියුවේ මා දුටු සහ අවබෝද කරගත් සත්‍ය නිරීක්ෂණයයි . එම නිසා මා දික්න්නේ ගැටලුව ඉතා සරල දෙයක් …නමුත් ගැටලුව නියම ආකාරයෙන් අවබෝද කර නොගැනීමෙන් එය නියත වශයෙන්ම වනයක් කරගෙන ඇති බවයි .

  6. හිජාබය, නිකාබය සහ බුර්කාව යනු කුමක්දැයි තවම බොහෝ දෙනෙක් නොදනිති. වැඩි විස්තර බලන්න:
    http://i33.tinypic.com/21ovha8.jpg

  7. ඉස්ලාමීය කාන්තා ඇඳුම ගැන විග්‍රහයක් මුස්ලිම් කාන්තාවන්ගේ දෘෂ්ටි කෝණයෙන් ඉදිරිපත් කිරීම වඩාත් සුදුසුයි. ඉස්ලාමීය කාන්තා ඇඳුම ගැන කතා කරන අනෙක් පිරිස සාමාන්‍යයෙන් කියන්නේ හුදෙක් මන්ඛ්කල්පිත කතන්දරය.

    //අද විවිධාකාර විලාසිතා තරග තියෙනවා. මුස්‌ලිම් කාන්තාවන් ඒ තරගවලට ඉදිරිපත් වෙන්නෙ නැද්ද?

    කොහෙත්ම නැහැ… අනිවාර්යෙන්ම ඒක අපේ ආගමෙන් තහනම් කරලා තියෙන දෙයක්‌.

    ඉතිං ඔබ බොරුනේ කියන්නෙ… මුස්‌ලිම් කාන්තාවන්ට අඳින්න පළඳින්න වගේම ඔවුන්ගේ බොහෝ කටයුතුවලට ඉස්‌ලාම් ආගමෙන් තහංචි පනවලානේ තියෙන්නේ…?

    නැහැ… නැහැ… අපේ ආගමේ එහෙම තහංචි දාලා නැහැ. නමුත් මුස්‌ලිම් කාන්තාවක්‌ විලාසිතා තරගවලට ඉදිරිපත් වෙන්නෙ නැහැ…//

    සංවාදයේ මේ කොටසින් පෙනී යන්නේ ඉස්ලාමීය නීති යනු කුමක්දැයි යන්න පැහැදිලිව විස්තර කිරීමට නොහැකි වූ බවයි. ඉස්ලාමීය සංකල්ප සාමාන්‍යයෙන් අරාබි බසින් අර්ථ දැක්වෙන අතර එය එක වරම සිංහල භාෂාවට සහ සංස්කෘතියට පරිවර්තනය කිරීම පහසු නොවේ.

    ඉස්ලාමය අදහන්නන්ට පව් සිදුවන දෑ කිරීම තහනම් වේ. එම තහනම නොතකා අදාළ ක්‍රියාව කිරීමෙන් පව් සිදුවන්නේය. නමුත් බොහෝ තහනම් (පාප) ක්‍රියාවන් කිරීම සඳහා බාහිර/සමාජීය බාධාවක් නැත. අදාළ පාපය කරන්නා අදාළ පාපයේ කර්මය ලෝකෝත්තර වශයෙන් බලපාන බව වටහා ගත යුතුය. මිනී මැරුම්, කොල්ල කෑම වැනි ඇතැම් පාප ක්‍රියාවන් වලට එරෙහිව බාහිර නීති ක්‍රියාත්මක වන්නේය. ඉස්ලාමීය නීති ක්‍රියාත්මක නොවන රටකනම් රටේ නීතිය ක්‍රියාත්මක වන්නේය.

    ඉහත සංවාදය තුල, විලාසිතා තරඟ වලට සහබාගි වීම තහනම් බව කල ප්‍රකාශයේ අර්ථය වන්නේ එය පව් සිදුවන ක්‍රියාවක් බවයි (ඉස්ලාමය තුල මෙය පවක් වන්නේ ඇයිද යන්න වෙනම විග්‍රහ කල යුතුය). එම පාපය නොසලකා මුස්ලිම් කතක් විලාසිතා තරඟ වලට සහබාගි වන්නේනම් එසේ කිරීමට ඇයට සමාජීය වශයෙන් නිදහස ඇත. සමාජීය වශයෙන් නිදහසක් ඇත යන්නෙන් අදහස් වන්නේ, අනෙක් මුසල්මානුවන් ඇයට හිරිහැරයක් නොකළ යුතු බවයි.

  8. … ඒ කොහොමවුනත් දැන් මුස්ලිම් ඇඳුමුත් ‘ලිබරල්වාදී’ වෙලයි තියෙන්නේ. විවේචනයක් හෙම කරනවා නෙමෙයි, මුස්ලිම් ඇඳුම ‘ගෝත්‍රික’ විදිහට දකින ‘ඉදිරිගාමී’ උන්දැලාට ආරංචියක් විදිහටයි. මුස්ලිම් රටක අදින එක පසුගාමී විදිහටත්, බටහිර යුරෝපා රටක නම් දියුණු විලාසිතාවක් විදිහටත් අර්ථ නිරූපණය කරන අමන කුහකයින්ට මේ සයිට් එකට ගියාම බලාගන්න පුලුවන් මුස්ලිම් ඇඳුමුත් ‘ෆැෂන්’ වන විදිහ.

    http://www.islamicdesignhouse.com/uk;jsessionid=32133376F01C439A872B034E6D44373B

  9. කිසියමි කෙනෙකු ශල්යතකර්මයකට යොමුවන්නේ ආශාවකට නොව තම ඡිවිතට ඇති අවධානම මගහරවාගෙනිමටය. මෙි සමිබන්දව අල් කුර්ආණයේ සුරා2(බකරා -අංක173වැකිවයේ කරැණද මෙහි බලපැවැත්වෙි. 2:173. (විශ්වාසවන්තයිනි! අනුභවයට) ඔබට වළක්වන ලද දැය නම්, (ඉබේ) මරණයට පත් වූ දැයද, ලේද, ඌරන්ගේ මස් මාංශද, (කුර්බාන් කරන විට) අල්ලාහ් නොවන (වෙනත්) නාමයක් කියන ලද දැයද වන්නේය. එබැවින් කවුරුන් හෝ සීමාව ඉක්මවා නොයාද, පාපයක් කිරීමේ අදහසක් නොමැතිවද සිටියදී, (මේවා අනුභව කිරීමට) බල කරනු ලැබුවහොත් (එය), ඔහු කෙරෙහි වරදක් නැත. නියත වශයෙන්ම අල්ලාහ් ඉතාමත් ක්ෂමා කරන්නෙකු වශයෙන්ද, අසීමිත දයාබරවද සිටින්නේය. මෙහි යමිකෙනෙකු පිඩිත තත්වයකදි කරන සෙයක් පවක් නොවන බවයි.
    අනෙක් කරැණනමි ඉස්ලාමාය කාන්තාවන්ට විළාසිතාව තහනමක් නොමැත .එය සිදුකළ යුත්තේ කාන්තාවන් ඉදියේ පමණි. නමුත් අද විලාසිතායනු මාධ්යව ඉදිරියේ තම ශරිරය පරතාවදර්ශණය කිරිමක් පමණි.
    ඉසුලාමිය කාන්තාවක් තම මුහුණ වැසිය යුතුද? පැණයට මා මෙයට පෙර (ඉස්ලාමිය කාන්තාවන්ගේ වස්ත්ර ය හා ලාංකික කාන්තාවන්ගේ වස්ත්රෙය)යටතේ කුර්ආන් හදිස් සමග පලකර ඇත (අන්වර් සඓාදරයා මෙහි එම ලින්ක්එක යොමු කරන ලෙස ඉල්ලාසිටිමි)ඉසුලාමි දහමට හා කළු පැහැයට කිසිදු සමිභන්ධයක් නැත.මෙම හබායා වස්ත්රරය විවිධ වර්නවලින් ඇත. කළු .තද නිල් .තද කොල.මැදපෙරදිග රටවල මෙවෙනි පාට හබායා වස්ත්ර පලදින අතර සමස්ථයක් වශයෙන් කළු පැහැ වස්ත්රිය ප්රවයකරති. මෙහි කතෘතුමාගේ අසහස අනුව කළු පැහැති වස්ත්රයය පැලදිමෙන් සමාඡයේ අප්රිරයතාවයක් අතිවි ඇතිබවයි හේතුව කළු යනු ඉති ගුප්ත පාටකි.ඉස්ලාමිය කාන්තාවක් හබායා පලදින්නේ තම ශරිරය අන්යඅන්ගේ නෙත්වලින් වැළකි සිටිමටයි. එසේනමි ඔවුන්ගේ අභිප්රාේය ඉස්ටවි ඇත. අපසතුටුවිය යුතු කරැණකි.

Comments are closed.