දැරියන්ට සොකරි පෙන්නන්න බොදුබල සර් ලැගුම්හලකට ගෙනිහින්!

මහනුවර මානව ව්‍යසායකත්ව පුහුණු විද්‍යා පීඨයේ නේවාසිකව අධ්‍යාපනය ලබමින් සිටි පාසැල් වයසේ පසුවන ගැහැණු ළමුන් අපයෝජනය කිරීමේ සිදුවීමේ තවත් තොරතුරු රැසක් හෙළි වෙමින් ඇති බව වාර්තා වනවා. ඒ එම ගැහැණු ළමුන් ලබා දෙන තොරතුරුවලට අනුවයි. මෙම සිදුවීමේ ප්‍රධාන සැකකරු ලෙස නම් කර ඇති චන්දිමාල් ගමගේ නැමැති දේශකවරයා මේ වන විට සිටින්නේ රක්ෂිත බන්ධනාගාරගතවයි.

“මාසයකට විතර උඩදී අපේ ඇකඩමි එකේ ඉගෙන ගනිමින් හිටපු මටත් මගේ මිතුරියකටත් තදබල අසනීප තත්ත්වයක් ඇති වුණා. අපේ නේවාසිකාගාරයේ පාලිකාව අපිට කිව්වා චන්දිමාල් සර් එක්ක ගිහින් බෙහෙත් ටිකක් අරගෙන එන්න කියලා. අපි ගියේ සර්ගේ කාර් එකේ. මුලින්ම සර් අපෙන් ඇහුවා ඔයාලා බොන්න කැමැති මොනවද කියලා. අපි මොනවත් කිව්වේ නෑ. ඒත් සර් අපිට ෆේස්ට්‍රි වගයකුයි කිරි තේයි අරන් දුන්නා.

ඊට පස්සේ ඩිස්පැන්සරියකට එක්කගෙන ගිහින් බෙහෙත් අරන් දුන්නා. අන්තිමට සර් අපිව මහනුවර නගරයේ සුප්‍රසිද්ධ රෙදිපිළි වෙළෙද සලකට එක්කගෙන ගියා. ඔයාලා අඳින්න කැමැති මොනවද කියා සර් අපෙන් ඇහුවා. එහෙම කියලා සර් අප එක්කගෙන ගියේ කාන්තා යට ඇඳුම් තියෙන තැනට. අඩුම ගානේ මේවා වත් ගන්න කියලා සර් අපිට කිව්වා. ඊට පස්සේ සර් අපිට යට ඇඳුම් කීපයක් බලෙන්ම වගේ අරන් දුන්නා. ඒත් එක්කම සර් මගේ මිතුරියගේ කරට අත දැම්මා.”

මේ ප්‍රකාශය මහනුවර පොලීසියේ ළමා හා කාන්තා කාර්යාංශයේ පොලිස් පොතේ සටහන් වී ඇත්තේ නේවාසික අධ්‍යාපන ආයතනයේ ඉගෙනුම ලැබු වයස අවුරුදු 16 සහ 17 පසු වූ සිසුවියන් දෙදෙනකුගේ සාක්ෂි අනුවයි.

දිනය පසුගිය ජුලි 31 වැනිදායි. කෙමෙන් කෙමෙන් රාත්‍රිය උදා වෙමින් තිබිණු අතර සිසුවියන් පිරිසට වෙනදා මෙන් නොව මොකක්දෝ අමුත්තක් දැනෙන්නට පටන් ගෙන තිබුණේ නේවාසිකාගාරයේ පාලිකාව එහි මුළුතැන්ගෙට ගොස් මස් බදින්නට වී ඇති නිසායි.

මේ අතරතුර නේවාසිකාගාරයේ හිමිකරු වන චන්දිමාල් තම අතිශය හිතවත් කෝටිපති ව්‍යාපාරිකයකු සහ තවත් සගයන් කීප දෙනෙකු සමග නේවාසිකාගාරය පිහිටි භූමියේ ඇති ගෙමිදුලේ මත්පැන් සාදයක් ආරම්භ කරන්නේ රාත්‍රී දහයට පමණයි.

“එදා රෑ නවය දහය වෙනකොට අපේ මිතුරියන් අතරින් ගොඩක් අයට හොඳටම නින්ද ගියා. ඒත් අපි කීප දෙනෙක් පාඩම් කරමින් හිටියේ. රෑ දහයට විතර තමයි අපිට මිදුල පැත්තෙන් කටහඩවල් ඇහෙන්න පටන් ගත්තේ ඒ නිසා අපි හොරෙන් ජනෙල්වලින් බැලුවා. එතකොට තමයි අපි දැක්කේ චන්දිමාල් සර් එක්ක අපි දන්න මහනුවර අංකල් කෙනෙකුත් තවත් කීප දෙනෙකුත් එක්ක අපේ නේවාසිකාගාරයේ මිදුලේ තිබෙන බෙන්ච් එකක අරක්කු බෝතල් තියාගෙන බොනවා . 

එතකොට රෑ දොළහට දොළහහමාරට විතර ඇති. එත් එක්කම අපි ජනේලය ළඟ තියෙන ලයිට් කීපයක් දැම්මා. අපේ ගණිතය උගන්වන මැඩම් සර්ලාට මොනවද අරගෙන අපේ ජනෙල් ළඟින් යනකොට එයා අපව දැක්කා. ආ ළමයි තාම නිදි නැද්ද කියලා මැඩම් අපෙන් ඇහුවා. අපි නෑ කිව්වා. ඒත් එක්කම අපි හොඳටම බය වුණා. ඊට පස්සේ තමයි අපි අපේ යාළුවෝ ඔක්කොටම ඇහැරවලා ගත්තේ.”

අපි දන්නවා චන්දිමාල් සර්ගේ හැටි. ඒ නිසා අපිට එදා ලොකු බයක් ඇති වුණා. ඊට පස්සේ අපේ යාළුවෝ අතර හිටපු කීප දෙනෙක් බයටම වගේ කියන්න පටන් ගත්තා සර් අපිව හෝටල්වලට ගෙනිච්චා. අපේ ඇඳුම් ගැලෙව්වා. අපිට අරහෙම කළා මෙහෙම දේවල් කළා කියලා. මේ වගේ කථා අපේ යාළුවන් අතර හිටපු සමහරු කියන්න පටන් ගත්තා. මේ කථා අහනකොට අපි හැමෝටම හිතුණේ අපි මහා කරදරයක වැටෙන්න නේද යන්නේ කියලා.

අපි දැන් මොනවහරි කරමු කියලා අපි කතා වුණා. ඊට පස්සේ අපි නේවාසිකාගාරයේ ලයිට් දාලා මහා හයියෙන් හිනා වෙන්න, සින්දු කියන්න, කෑගහන්න පටන් ගත්තා. ඊට පස්සේ ටික වෙලාවකින් චන්දිමාල් සර් සහ එයාත් එක්ක හිටපු අය මිදුලේ හිටපු බෙන්ච් එකේ ඉන්නවා අපි දැක්කේ නෑ.”

සිසුවියන්ගේ පාර්ශවය වෙනුවෙන් අධිකරණ කටයුතුවලට සහාය වන නීතීඥ මහතා මේ සම්බන්ධයෙන් සති අන්ත පුවත්පතකට සඳහන් කර තිබුණේ මෙවන් ප්‍රකාශයක්.

“සිසුවියන්ගේ ප්‍රකාශ අනුව විවිධ ලිංගික හිංසනයන්ට මේ දරුවන් මුහුණ දී තිබෙන බව අණාවරණය වෙලා තිබෙනවා. මෙහි ප්‍රධාන සැකකරු මේ අධ්‍යාපන ආයතනයේ හිමිකරු වන චන්දිමාල් ගමගේයි. ඒ වගේම ඔහුගේ ව්‍යාපාරික මිතුරකු වන මහනුවර පේරාදෙනිය පාර කටුකැලේ පදිංචි ප්‍රසිද්ධ ව්‍යාපාරිකයකුටත් චෝදනා එල්ල වෙලා තිබෙනවා.

චන්දිමාල් පසුගිය පොසොන් දිනයේ සිසුවියක් එක්තරා ලැගුම්හලකට ගෙන ගොස් තිබෙන්නේ සොකරි නාට්‍ය බලන්න යමු කියලා. එදින එම ලැගුම් හලේදී සිසුවිය සිප වැළද ගෙන යම් ලිංගික හිංසනයක් සිදු කොට තිබෙන බව සිසුවියගේ ප්‍රකාශයකින් අණාවරණය වෙලා තිබෙනවා.

ඒ වගේම චන්දිමාල් ගමගේ නමැත්තාගේ ව්‍යාපාරික මිතුරා පොසොන් දිනයේ තවත් සිසුවියක් එක්තරා ලැගුම්හලකට ගෙන ගොස් තිබෙනවා. එම සිසුවිය සිප වැළඳගෙන යම් යම් හිංසනයන් කර තිබෙන බවට කරුණු වාර්තා වෙලා තිබෙනවා.

මේ සියලුම ලැගුම්හල් මහනුවර පොලීසියේ පොලිස් කණ්ඩායම් සමග ගොස් සිසුවියන් විසින් හඳුනා ගෙන තිබෙනවා. එමෙන්ම චෝදනා එල්ලවන ව්‍යාපාරිකයාගේ මහනුවර කටුකැලේ තිබෙන කාර්යාලයට සිසුවියන් දෙදෙනකු ගෙන ගොස් සිප වැළඳ ගෙන තිබෙන බව වාර්තා වෙලා තිබෙනවා.

එම් ස්ථානත් සිසුවියන් විසින් පොලීසිය සමග ගොස් හඳුනා ගෙන තිබෙනවා. පසුගිය 31 වෙනිදා සිදුවු සිදුවීමත් සමග තමයි මේ සියල්ල අණාවරණය වුණේ. කෙසේ වෙතත් ළමයි තමන්ට සිදුවු ලිංගික හිංසනයන් මෙතෙක් සඟවා ගෙන සිටීම කනගාටුදායක තත්ත්වයක්.”

 

මේ සම්බන්ධව තවත් පුවතක මෙසේ තොරතුරු සටහන් වී තිබුණා.

 

උපුටා ගැනීම

නේවාසිකාගාර සිසුවියන් ලිංගික අපයෝජනයට ලක්වෙලා! බොදුබලසේනා අන්තේවාසියකුගේ රෙදි ගැලවෙයි!

නේවාසිකාගාර සිසුවියන් ලිංගික අපයෝජනයට ලක්වෙලා. මහනුවර ප්‍රදේශයේ පවත්වාගෙන ගිය මානව නිපුණතා වැඩිදියුණු කිරීමේ නේවාසික පාඨමාලාවකට සම්බන්ධ වී සිටි දැරියන් නව දෙනෙකු අතවරයට ලක්වී ඇති බව තහවුරු වී ඇතැයි පොලීසිය පවසයි.

දැරියන් දාහත් දෙනෙකු අතුරින් වයස අවුරුදු 15ත් 17ත් අතර දැරියන් නව දෙනෙකු අතවරයට පත්වී ඇති බව වෛද්‍ය පරීක්ෂණ වලින් තහවුරු වී ඇති බවයි, පොලීසිය කියා සිටියේ. නේවාසික පාඨමාලාව තුල තමන්ට සිදුවන අකටයුතුකම් ඉවසා දරා සිටීමට නොහැකි වු සිසුවියන් සිව් දෙනෙකු පසුගිය සදුදා අලුයම එම මධ්‍යස්ථානයෙන් පැනගොස් කැලෑවක රැදී සිට අසල්වැසියන්ගේ සහාය ඇතුව පොලීසියට මේ ගැන පැමිණිලි කර තිබේ.

පසුගියවර අපොස සාමාන්‍ය පෙල විභාගයට පෙනීසිට අසමත්වු සිසු සිසුවියන්ගේ මානසික වර්ධනය කර නැවත ඔවුන් විභාගයට සුදානම් කරදීමේ සය මාසික නේවාසික පාඨමාලාවක් සම්බන්ධව පුවත්පත්වල පලවු දැන්වීමක් ඔස්සේ ළමුන් ඊට ඇතුලත් කොට ඇති බවයි, ප්‍රසාද් පුර්නිමාල් ජයමාන්න සංදේශයට වාර්තා කළේ. ළමුන්ගේ මව්පියන් ඒ සදහා රුපියල් එක්ලක්ෂ හතලිස් දහසක පාඨමාලා ගාස්තුවක්ද ගෙවා තිබේ.

නේවාසික පාඨමාලාව හැදෑරූ සිසුවියන්ට ඔවුන්ගේ මව්පියන් හමුවීමට අවස්ථාව ලබාදී ඇත්තේ මසකට එක්වරක් පමණි.

මව්පියන්ට දැනුම් නොදී දවස් දෙකක් රාත්‍රියේ මේ ළමයි එළියට එක්ක ගිහින් තියෙනවා, තවත් දරුවෙකුත් එක්ක. අතවරයට ලක්වු දැරියකගේ මවක් එසේ පැවසුවාය.

සිය දරුවා බැලීමට ගිය අවස්ථා වලදී ඇය සමග නිසියාකාරව අදහස් හුවමාරු කර ගැනීමට බාධාවන ආකාරයට නේවාසිකාගාරයේ පාලිකාවන් හැසිරුනු බවත් ඉහතකී මව වැඩිදුරටත් කියා සිටියාය.

අදාල සිදුවීම සම්බන්ධයෙන් පොලීසිය කටයුතු කළ ආකාරය ගැන සෑහීමකට පත්විය නොහැකි බවද මව්පියෝ පවසති.

BBC සංදේශය වෙනුවෙන් ප්‍රසාද් පූර්ණිමාල් අදාළ සිද්ධිය මෙසේ වාර්තා කර තිබිණි.

සිද්ධිය ගැන නැවත කියන්නට දෙයක් නැත. මේ සම්බන්ධයෙන් චෝදනා එල්ල වී ඇත්තේ බොදුබලසේනා සංවිධානයේ ලොක්කන්ටය. මොරටුව ප්‍රදේශයේ කතෝලික පල්ලියක මෙවැනි අතවර සිද්ධියක් වු බව වසර තුනකට පමණ පෙර මාධ්‍ය මගින් වාර්තා කෙරිණි. ඒ වෙලාවේ බොදුබලසේනා සංවිධානය මාරාවේෂයෙන් පාරට බැස්සේය. ඔවුන් පොලීසිය ඉදිරිපිටට ගොස් උද්ඝෝෂණය කළේ සැකකරුවන් අත්අඩංගුවට ගන්නා ලෙස බලකරමිනි.

දැන් රෙදි ගැලවී ඇත්තේ ඒ ජාතියෙන් වැඩකළ උන්ගේය. බොදුබලසේනා නම් අන්තවාදී සංවිධානය මහින්ද රාජපක්ෂ ආන්ඩුවේ දේශපාලන අවශ්‍යතාව මත නිර්මාණය කෙරුණකි. ඊට ආරක්ෂක අමාත්‍යාංශයේ හිටපු ලේකම් ගෝඨාභය රාජපක්ෂ වැන්නන්ගේ පූර්ණ අනුග්‍රහය ලැබු බවට සාක්ෂි තිබේ. ඒ වෙලාවේ ආන්ඩුවට ජනතාවගෙන් එල්ල වු විරෝධය මැඩපවත්වන්නට ඔවුන් භාවිතා කළේ ජාතිවාදයය. ආගම්වාදයය.

මහින්ද රාජපක්ෂ ආන්ඩුවේ ඒ ජාතියේ පිම්පි වැඩේ කළ ඩිලන්ත සහ චන්දිමාල් යන බොදුබලසේනා ලොක්කන් දෙදෙනාට මේ සිද්ධියට අදාල චෝදනාව එල්ල වී තිබේ.

ඔවුන් පුහුණු මධ්‍යස්ථානය ගැන පුවත්පත්වල දැන්වීම් පලකර තිබේ. ඒ වෙනුවෙන් ඔවුන් ඇතැම් මාධ්‍යවේදීන්ට හොදට ගෙවා තිබේ.

මේ මධ්‍යස්ථානයේ සිදුවන අපරාධ සම්බන්ධයෙන් ඇතැම් මව්පියන් මාධ්‍යට පැවසීමට උත්සාහ කර ඇතත්, එය වලක්වා ඇත්තේ මුදල් ගත් අදාල කුළී මාධ්‍යවේදීන්ය.

බොදුබලසේනා සංවිධානයේ මහමොළකරුවන් හෙවත් රාජපක්ෂ ආන්ඩුවේ පිම්පි වැඩේ කළ මස් වැද්දන් මේ ජාතියේ වැඩකරන බව අපි මීට පෙරද ලියා ඇත්තෙමු. ඒත් රාජපක්ෂ ආන්ඩුව පැවති කාලයේදී ඒවා බලයෙන් වැසී ගියේය. ආරක්ෂක අමාත්‍යාංශය මේ ලොක්කන් රැක්කේය. ඔවුන්ට රුපියල් කෝටි ගණනින් මුදල් ආවේය. ඒ ගැන පරීක්ෂණ පැවැත්වීම තහනම් විය.

2015 ජනවාරි 8 වැනිදා අලුත් ආන්ඩුව පත්වීමෙන් පසු මේ බොදුබලසේනා සංවිධානය සහ එහි ලොක්කන් පසුබැසීමේ ප්‍රතිපත්තිය අනුගමනය කළේය. සද්ද වහගෙන සිටියේය. ඒත් ඒ අතරේ අලුත් ආන්ඩුවේ ඇතැම් ඩීල් කාරයන්ට සල්ලි විසි කළේය. මේ සල්ලි විසි කෙරිල්ල නිසා තවදුරටත් ඔවුන් ආරක්ෂිත විය. අලුත් ආන්ඩුව යටතේද අවුරුදු එකහමාරක් යනතුරු ඩිලන්ත විතානගේ වැන්නන් කිසිදු ගැටළුවකින් තොරව මේ ගේම ගැහුවේ ඒ නිසාය.

මේ සිද්ධියත් සමග ඔවුන්ගේ රෙදි ගැලවෙමින් ඇත. ඒත් පරණ ආන්ඩුවේ ලොක්කන් මෙන්ම මේ ආන්ඩුවේද ඇතැම් ලොක්කන් ඔවුන්ට යළිත් රෙදි අන්දවන්නට උත්සාහ දැරීම අනිවාර්යය. ඒ නිසා ආන්ඩුව කොන්ද කෙලින් තබාගෙන මේ සිද්ධියේදී කටයුතු කළ යුතුය.

ජාතිවාදය සහ ආගම්වාදය අවුස්සමින් රට ගිනි තියමින් පිම්පි රස්සාවේ යෙදුනු බොදුබලසේනා සංවිධානය හෙලුවෙන් හිටගෙන සිටී. මොවුන්ගේ ඇත්ත කෙරුවාව ගැන නොදැන මොවුන්ට රැවටුණු අහිංසකයින් දැන්වත් ඇත්ත තේරුම් ගත යුතුය. එසේම තමන් වලට ඇද දැමු මේ මස් වැද්දන්ට ගැලවෙන්නට ඉඩ නොදිය යුතුය. අර දරුවන් ඉල්ලන්නේ ඒ සාධාරණය ය.

ශාලික

 

උපුටා ගැනීම අවසන්

 

 

Irudina-Hantana sexual abuse case_ allegation on BBS heads-p.27-07th August